Tume yapunguza mishahara ya viongozi Kenya

NAIROBI- TUME ya Mishahara na Marupurupu ya Watumishi wa Umma nchini, imetangaza kupunguzwa kwa mishahara ya maofisa wakuu wakiwemo rais na wabunge.

Mwenyekiti wa tume hiyo, Sarah Serem ametoa mpangilio mpya wa malipo ambao anasema utaokoa jumla ya sh bilioni 8 (fedha za Kenya) kila mwaka na kupunguza jumla ya mishahara inayolipwa watumishi wa umma kwa asilimia 35.

Tume hiyo, imependekeza kufutiliwa mbali kwa marupurupu ya kipimo cha usafiri wa magari kwa magavana na wabunge na badala yake hilo litakuwa likifidiwa na mfumo mpya wa marupurupu kwa kuzingatia kanda.

Rais sasa atakuwa akilipwa sh milioni 1.4 kwa mwezi badala ya sh milioni 1.5, wakati naibu wake awe akilipwa sh milioni 1.2. Mawaziri watakuwa wakilipwa sh 924,000, Spika wa Bunge sh milioni 1.1, huku magavana wa kaunti watalipwa sh 924,000.

Mabadiliko hayo yataanza kutekelezwa tarehe 8 Agosti, 2017. Serem amesema maofisa wa Serikali walikuwa wakitumia vibaya mfumo wa marupurupu wa kupimiwa usafiri wa magari.

Badala yake, maofisa sasa watakuwa wakilipwa marupurupu ya kila mwezi ya usafiri kwa kutegemea eneo anakotoka ofisa husika. Magavana na manaibu wa magavana pia hawatakuwa wakilipwa tena marupurupu.

Wabunge, ambao wamekuwa wakilipwa marupurupu kwa kuhudhuria vikao vya kamati mbalimbali, pia watakosa marupurupu hayo. Viongozi wa Serikali ya upinzani bungeni, ambao pia walikuwa wakipokea marupurupu ya majukumu maalum pia hawatalipwa tena marupurupu hayo.

Mishahara hiyo mipya itaanza kutekelezwa baada ya uchaguzi mkuu wa Agosti. Maafisa ambao mihula yao haitakuwa imemalizika mwaka huu wataendelea kupokea mishahara yao ya awali.

Hata hivyo, watakaorithi nyadhifa hiyo watalipwa kwa kufuata utaratibu mpya.

Mishahara mipya: