Tuko tayari kudhibiti matukio ovu kabla na baada ya uchaguzi - Boinnet

NAIROBI- MKUU wa Jeshi la Polisi nchini, IGP Joseph Boinnet, amebainisha kwamba maofisa wa polisi wamepata mafunzo maalum ya kudhibiti matukio yoyote yenye viashiria ovu kabla, wakati na baada ya uchaguzi mkuu wa Agosti 8.

Licha ya jeshi hilo kutoa ramani ya maeneo tata zaidi ambayo vurugu zinaweza kutokea, IGP Boinnet aliongeza kuwa polisi watahakikisha kuwa sheria na taratibu zinaheshimika ili kuepusha kutokea kwa machafuko kama yale ya 2007-08 yaliyosababisha kuuawa kwa watu 1,000 na wengine 60,000 kukimbia makazi yao.

“Kwenye tukio ovu la aina yoyote litakalotokea nchini, mwitikio wetu utakuwa wa haraka na wenye kuhakikisha utii wa sheria bila shuruti unafuatwa,” alisema Boinnet.

Mkuu huyo wa polisi, amekuwa akifanya mikutano ya mara kwa mara na maofisa wake tangu mwezi uliopita yenye lengo la kuwapatia mbinu polisi ya namna ya kuzuia na kukabili matukio yoyote yale.

Akizungumza kwenye kipindi cha JKL show cha Citizen TV, Boinnet aliwataka Wakenya kutumia haki yao ya kidemokrasia kupiga kura kwa amani na kushirikiana na vyombo vya ulinzi na usalama.

“Kama zilivyo chaguzi nyinginezo, lazima kutakuwa na watu ambao hawatafurahi wakati wengine wakifurahi. Lakini kama nilivyosema, tutakuwa tayari kwa lolote litakalotokea, siku hiyo na baada ya siku hiyo,” alisema Boinnet.

Capital News.