Seneta aliyemnyonyesha mtoto bungeni ajiuzulu Australia

SYDNEY- SENETA aliyeweka historia nchini kwa kumnyonyesha mtoto bungeni, Larissa Waters amejiuzulu baada ya kugundua kwamba ana uraia wa nchi mbili.

Waters, kutoka chama cha Greens, alizaliwa nchini Canada. Chini ya Katiba ya Australia, mtu haruhusiwi kuwania wadhifa wowote katika Serikali ya taifa iwapo ana uraia wa nchi mbili na zaidi.

Ijumaa iliyopita, seneta mwingine wa chama cha Greens, Scott Ludlam, alijiuzulu kwa sababu kama ya Waters. Wanasiasa wote wawili walikuwa manaibu viongozi wa chama hicho.

Mei mwaka huu, Waters alipata umaarufu kimataifa baada ya kuwa mwanasiasa wa kwanza kumnyonyesha mtoto katika bunge la Australia.

Waters anasema aligundua hali yake ya uraia baada ya kuibuliwa kwa kisa cha Ludlam, ambaye aligundua kwamba naye ana uraia wa New Zealand.

Huku akijidhatiti kuzuia machozi katika kikao cha wanahabari jana, Waters alisema lilikuwa kosa lisilo la kukusudia.

“Nilisikitika baada ya kugundua kwamba, kwa sababu ya sheria za miaka 70 nchini Canada, nimekuwa na uraia wa nchi mbili tangu kuzaliwa kwangu, na kwamba sheria nchini Canada ilibadilishwa wiki moja baada ya kuzaliwa kwangu. Sheria mpya ilinitaka kuukana uraia wangu wa Canada,” alisema Waters.

Seneta huyo ambaye sasa ana miaka 40, alikuwa na umri wa miezi 11 alipoondoka Canada akiwa na wazazi wake ambao ni raia wa Australia.

“Yote haya yalitokea kabla hata sijaweza kutamka hata neno la kwanza,” alisema. Hata hivyo, Waters, ambaye alichaguliwa mara ya kwanza 2011, amesema anakubali lawama.

Haijabainika iwapo yeye pamoja na Ludlam, watalipa fedha ambazo wamepokea kama mshahara na marupurupu katika kipindi ambacho wamehudumu.

Kwa mujibu wa Katiba ya Australia, mwanasiasa ni lazima aukane uraia wake wa taifa lingine kabla ya kuwania wadhifa wa kisiasa.

BBC.