Trump adaiwa kukutana kwa siri na Putin

WASHINGTON DC- IMEBAINIKA kuwa Rais Donald Trump alikutana na mwenzake wa Urusi, Vladmir Putin katika mkutano wa pili wa siri ambao haukutajwa ulipofanyika katika kikao cha mkutano wa mataifa ya G20.

Inadaiwa kuwa, walifanya mazungumzo baada ya mkutano wao wa kwanza, lakini ikulu ya White House haijatoa maelezo kuhusu kile kilichozungumziwa.

Rais Trump amekana madai ya kufanyika kwa mkutano huo wa siri na Putin na kusema ni ‘habari bandia’. Uhusiano wa viongozi hao wawili unachunguzwa, kufuatia madai kwamba kampeni timu ya Trump ilishirikiana na Urusi.

Wapelelezi wa Marekani, wanaamini kwamba Urusi ilimsaidia Trump kushinda uchaguzi wa mwaka jana kitu ambacho Urusi imekana.

Trump amepinga madai kama hayo. Mkutano huo wa pili, unadaiwa kufanyika wakati wa chakula cha jioni cha viongozi katika kikao hicho cha G20 mjini Hamburg mapema mwezi huu

Rais Trump alikuwa pekee wakati Putin alikuwa na mkalimani wake, huku vyombo vya habari vya Marekani vikisema mkutano huo ulidumu kwa muda wa saa moja.

Madai ya kilichozungumzwa yaliwasilishwa kwa maofisa wa Ikulu ya Whitehouse na Trump mwenyewe, kwa kuwa hakukuwa na wasaidizi wakati wa mkutano huo.

BBC.