NASA Kenya yapoteza kesi ya kusitisha uchaguzi

NAIROBI- MUUNGANO wa upinzani nchini (NASA), umepata pigo kufuatia kupoteza kesi nyingine dhidi ya Tume ya Huru ya Uchaguzi (IEBC).

Muungano huo unaoongozwa na kiongozi wa upinzani na mgombea wa urais, Raila Odinga, ulipoteza ombi ulilowasilisha mahakamani ukitaka uchaguzi kusitishwa katika kaunti zilizoathirika ama kata iwapo mfumo wa kielektroniki wa kupiga kura utafeli.

Katika ombi hilo, NASA ilihoji kwamba IEBC ilifeli kuweka mfumo mahsusi kama inavyohitajika kisheria.

Upinzani ulitegemea kifungu cha 55 cha sheria ya uchaguzi, ambacho kinaitaka IEBC kuahirisha uchaguzi hadi pale mfumo mahsusi wa kupigia kura utakapowekwa.

Lakini, jopo la majaji likiongozwa na Jaji Kanyi Kimondo, pamoja na Hedwig Ong'udi na Alfred Mabeya waliipinga kesi NASA wakisema IEBC imeweka mikakati ya kukabiliana na tatizo la kufeli kwa mfumo huo wa upigaji kura.

Walikubaliana na IEBC kwamba, tume hiyo imeweka mikakati ya kukabiliana na utambuzi wa wapiga kura na urushaji moja kwa moja wa matokeo iwapo mfumo huo utafeli.

Kulingana na majaji hao, NASA ilishindwa kuelezea kesi yao na kuongezea kwamba, ombi hilo pia linaweza kuliweka taifa hilo katika hali ya sintofahamu.

BBC