Kombe la Mataifa Afrika sasa kufanyika Juni na Julai

RABAT- SHIRIKISHO la Soka Afrika (CAF), limesema kuwa kombe la Mataifa Afrika (CAN) 2019, litafanyika Juni na Julai.

Mashindano hayo huwa unafanyika Januari na Februari, na kusababisha migogoro na vilabu vya Ulaya ambavyo hulazimika kuwatoa wachezaji katikati ya msimu.

Kinyang'anyiro hicho cha 2019 kitakachoandaliwa Cameroon, kitashirikisha timu 24 badala ya 16. Mabadiliko hayo yalitiwa sahihi na kamati kuu ya CAF, katika mkutano uliofanyika mjini hapa.

Uongezaji wa timu hizo unaweza kusababisha matatizo kwa Cameroon ambayo itaanda fainali ijayo, huku waziri wa michezo wa taifa hilo la Afrika ya Kati akilazimika kukataa ripoti kwamba maandalizi yalikuwa nyuma.

Hata hivyo, CAF imeshindwa kubadili miaka ya kufanyika na badala yake yataendelea kila baada ya miaka miwili barani Afrika. CAF ilikuwa inapanga iwapo itaruhusu mataifa kutoka mabara mengine kushiriki ama hata kuandaa michuano hiyo.

Tangazo hilo linajiri kufuatia mkutano wa siku mbili ulioandaliwa na Rais wa CAF, Ahmad Ahmad kuzungumzia hali ya soka barani Afrika.