Mtoto wa Simba Cecil wa Zimbabwe auawa

Cecil enzi za uhai wake kabla ya kuuawa mwaka 2015.

HARARE- MIAKA miwili baada ya simba dume aitwaye Cecil, kuuwawa na mwindaji nchini na kuzua shutuma kimataifa, mwanawe naye ameuwawa.

Xanda, simba mtoto mwenye umri wa miaka sita, alipigwa risasi na mwindaji na anaripotiwa kufia nje ya mbuga ya Hwange iliyopo Kaskazini mwa nchi.

Katika juhudi za kuzuia ujangili, Serikali kwa kushirikiana na watafiti kutoka Chuo Kikuu cha Oxford walilazimika kumuwekea Xanda kifaa maalum cha kumfuatilia.

Mwandishi wa BBC Harare, anasema kuwa akiwa na umri wa miaka sita, Xanda alikuwa amefikia umri wa kuweza kulengwa na wawindaji.

Wawindaji hao, wengi wao kutoka Marekani, Uingereza na Afrika Kusini, hulipa maelfu ya fedha kwa ajili ya kuruhusiwa kuwinda, na fedha hizo hutumiwa kugharimia watu ambao huwalinda wanyamapori.

Haijulikani ni nani alikuwa amelipa fedha ili kumuua Xanda.