Vijana sita wa Burundi watoweka Marekani

WASHINGTON DC- VIJANA sita wa Burundi waliokuwa wakishiriki katika mashindano ya roboti nchini, wameripotiwa kutoweka, polisi wanasema.

Vijana hao ambao ni wavulana wanne na wasichana 2 walio kati ya umri wa miaka 16 na 18, walipotea wakati wa mashindano hayo ya kwanza duniani yaliyofanyika jijini hapa.

Idara ya Polisi ya Washington DC, imesema mara ya mwisho vijana hao kuonekana ilikuwa ni Jumanne wakati wa makamilisho ya mashindano hayo.

Ripoti zinasema kuwa vijana wawili kati yao, tayari wamevuka mpaka na kuingia Canada lakini ripoti hiyo bado haijathibitishwa na polisi.

Jana, idara hiyo ya polisi ilibandika picha zenye sura za vijana hao sita waliopotea katika mtandao wao wa Twitter, wakiwataka raia kuwasiliana nao iwapo watakuwa na habari yoyote kuwahusu.

Vijana hao wametambulika kuwa Don Ingabire, Kevin Sambukiza, Nice Munezero, Audry Mwamikazi, Richard Irakoze na Aristide Irambona.

Waandaaji wa mashindano hayo, wanasema kuwa waliwaeleza polisi baada ya msimamizi wa timu hiyo ya Burundi kushindwa kuwapata vijana hao.

Katika taarifa hiyo, msemaji wa mashindano hayo Jose Escotto alisema, ripoti kamili imewasilishwa kwa polisi ambao wanachunguza kisa hicho, kulingana na gazeti la The Washington Post.

Mashindano hayo ya siku 3, yalihudhuriwa na timu 150 zilizokuwa zikishindana. Mashindano hayo yanalenga kuwashawishi vijana kukuza vipaji vyao katika masomo ya sayansi, technolojia, uhandisi na hesabu.

BBC