Melivita ya China yafanya ziara Hong Kong

BEIJING- MELIVITA ya kwanza ya China iitwayo Liaoning, yenye uwezo wa kubeba ndegevita imewasili mjini Hong Kong.

Ziara hiyo ya kwanza nje ya China bara, ni miongoni mwa maadhimisho ya miaka 20 tangu Uingereza ilipoikabidhi Hong Kong kwa China.

Hayo yanajiri muda mfupi baada ya ziara ya Rais Xi Jinping katika mji huo wiki iliyopita, ikiwa ni ya kwanza kama Rais wa China. Wakati wa ziara yake, ambayo ilikabiliwa na maandamano, alionya kwamba changomoto yoyote kwa serikali ya beijing haitakubalika.

Haki ya kisiasa ya Hong Kong imezua wasiwasi katika miaka ya hivi karibuni, huku kukiwa na mwito wa kujitawala pamoja na kupigania uhuru.

Mwaka 2014, China ilisema kuwa itaruhusu uchaguzi wa moja kwa moja wa kiongozi wa mji huo, lakini miongoni mwao wawepo wagombea waliokubalika na China.

Hatua hiyo ilisababisha maandamano yaliojulikana kuwa mwavuli, yakitaka uhuru katika uchaguzi huo. Ziara hiyo ya Xi ilijiri huku kukiwa na usalama mkali.

Baada ya Rais Xi kuondoka Jumamosi iliyopita, maelfu ya wananchi waliandamana wakitaka haki yao ya kidemokrasia.