Mke wa Hichilema aomba Zambia imwachie mumewe

Hakainde Hichilema

LUSAKA, Zambia

MKE wa kiongozi mkuu wa upinzani nchini, Hakainde Hichilema, ametoa mwito kwa jamii ya kimataifa kusaidia kuachiwa kwa mumewe.

Mutinta Hichilema alisema kuwa kudorora kwa demokrasia nchini, na nchi kutumbukia kwenye utawala wa kiimla ni jambo ambalo haliwezi kupuuzwa.

Alitoa matamshi hayo wakati Serikali ya Uingereza iliposema kuwa, wawekezaji wanatiwa hofu na kuendelea kuzuiwa kwa Hichilema kutokana na mashtaka ya uhaini.

Jana Jaji mmoja anayesikiliza mashitaka yanayomkabili Hichilema, alitarajiwa kuamua ikiwa kesi hio itatupiliwa mbali au ipelekwe kwenye mahakama ya juu. Mashtaka hayo yanatokana na kile kinachotajwa kuwa hatua ya Hichilema kuzuia msafara wa magari ya Rais.