Marekani yatoa trilioni 1.15/- kusaidia mapambano dhidi ya Ukimwi

Kaimu Balozi wa Marekani nchini Tanzania, Virginia Blaser

SERIKALI ya Marekani kupitia Mpango wa Dharura wa Rais wa nchi kukabiliana na Ukimwi (PEPFAR), imeidhinisha mpango wa kuipatia Tanzania msaada wa dola milioni 526 (sh trilioni 1.15) kwa ajili ya kupambana na ugonjwa huo.

Kupitia msaada huo, Tanzania itaweza kuendesha mapambano dhidi ya ugonjwa huo kwa upimaji virusi vya Ukimwi, tiba kwa waathirika, kufubaza virusi hivyo na kuongeza idadi ya watu wanaopatiwa huduma mbalimbali za kukabiliana na Ukimwi kufikia watu milioni 1.2.

Aidha, msaada huo unalenga kuongeza nguvu mapambano dhidi ya Ukimwi na kufikia lengo la kuondoa ugonjwa huo ifikapo mwaka 2030.

Taarifa ya ubalozi wa Marekani nchini imesema fedha hizo zitafadhili miradi inayotekelezwa chini mpango wa utekelezaji wa PEPFAR utakaoanza kutekelezwa Oktoba mwaka huu hadi Septemba 2018, kukiwa na ongezeko la asilimia 12.3 zaidi ya bajeti ya mwaka jana.

 Bajeti hiyo iliyotengwa inajumuisha pia utoaji wa huduma na matibabu kwa watoto yatima na wale walio katika mazingira hatarishi, pamoja na kukabiliana na ukatili wa kijinsia. PEPFAR, pia itasaidia mpango wa tohara ya hiari kwa wanaume, na kuwafikiwa walengwa 890,000.

Mpango huu unaendeleza ubia wa muda mrefu kati ya Marekani na Tanzania katika sekta ya afya ikiwa ni pamoja na muongo mmoja wa ushirikiano uliowezesha kudhibiti kwa mafanikio maambukizi ya VVU.

Akizungumza kuhusu msaada huo, Kaimu Balozi wa Marekani nchini, Virginia Blaser alisema kwamba; “Kwa pamoja tunafanya kazi, ili hatimaye kuwa na kizazi kisicho na Ukimwi Tanzania ambacho hakutakuwa na mtu awaye yeyote atakayeachwa nyuma.”