Korea Kaskazini yakiri kufanyia majaribio kombora lingine

Kombora la Pukguksong 2 lilipofanyiwa majaribio jana

PYONGYANG, Korea Kaskazini

KOREA Kaskazini imekiri kuwa imefanikiwa kwa mara nyingine, kurusha kwa mafanikio kombora la masafa.

Kwa mujibu wa taarifa iliyotolewa na Shirika la Habari nchini (KCNA), ilieleza kuwa kombora hilo lililojaribiwa Jumapili kwa sasa liko tayari kwa ajili ya matumizi ya kijeshi.

Ikulu ya White House ya Marekani, ilisema kuwa kombora hilo lilikuwa la masafa marefu kuliko makombora yaliyotumiwa na Korea Kaskazini wakati majaribio matatu ya awali.

Jaribio hilo linakuja wiki moja baada kufanyika kwa majaribio mengine, yaliyotajwa kuwa makombora mapya yenye uwezo wa kubeba vichwa vya nyuklia.

Jumatatu iliyopita Baraza la Usalama la Umoja wa Mataifa, lilisema kuwa Korea haistahili kufanya majaribio zaidi. Sasa baraza hilo linatarajiwa kukutana kwa faragha leo kwenye mkutano ulioitishwa na Marekani, Korea Kusini na Japan.

Kiongozi wa taifa, Kim Jong-un alishuhudia shughuli ya jaribio la kombora la Pukguksong-2 jana. Wizara ya Mashauri ya Nje ya Korea Kusini, imelitaja jaribio hilo kuwa la kiholela huku Waziri wa Mashauri ya Nje wa Marekani akilitaja kuwa la kughadhabisha.

Kombora hio lilisafiri umbali wa kilomita 560 kuelekea bahari ya Japan. Kombora la wiki iliyopita lilisafri umbali wa kilomita 700.