Watu 141 kwa kuhudhuria sherehe ya wapenzi jinsia moja

JAKARTA, Indonesia

POLISI nchini, wamewakamata wanaume 141 ambao walikuwa wanahudhuria sherehe ya wapenzi wa jinsia moja ambayo ilifanyika mwishoni mwa wiki jijini hapa.

Kwa mujibu wa taarifa iliyotolewa na polisi, sherehe hiyo iliyofanyika Jumapili, ilikuwa na kiingilio cha Rupia 185 (dola 14 za Marekani) lakini waliishia kukamatwa kutokana na vitendo hivyo.

Taarifa hiyo ilieleza kwamba, pamoja na watu waliokamatwa alikuwepo raia mmoja wa Uingereza. Katika siku za karibuni, Indonesia imeshuhudia kuongezeka kwa chuki kwa dhidi ya wapenzi wa jinsia moja.

Mapenzi kati ya watu wa jinsia moja sio marufuku kulingana na sheria za Indonesia, isipokuwa katika mkoa wa kihafidhina wa Aceh.

Lakini Msemaji wa Polisi wa Jakarta, Raden Argo Yuwono alisema baadhi ya wale walio kizuizini wanaweza kushtakiwa chini ya sheria kali ya Indonesia ya kupambana na vitendo vichafu.

“Baadhi yao walipatikana wakiwa wamevua nguo na wakishiriki ngono na wengine kujipiga punyeto wakati wa tukio,” aliiambia idhaa ya BBC Indonesia.

Chini ya sheria hizo kali za Indonesia, kuandaa onesho kama hilo ili kuwatumbuiza watu inaweza kufasiriwa kama kosa la kutenda kitendo kichafu eneo la umma.

Wiki iliyopita, wanaume wawili walihukumiwa kuchapwa viboko mbele ya umma katika mkoa wa Aceh, baada ya kupatikana wakifanya ngono. Sheria kali dhidi ya uhusiano wa kimapenzi kati ya watu wa jinsia moja, zilianza kutekelezwa nchini mwaka 2014.

Mapema mwezi huu, polisi waliwatia mbaroni watu 14 katika mji wa Surabaya.

BBC