Kisa maepnzi; Binti wa mfalme Japan aukimbia ufalme

TOKYO, Japan

BINTI wa mfalme nchini, Mako Akihito ameamua kuacha maisha ya kifalme kwa ajili ya mapenzi, na anatarajiwa kuolewa siku za hivi karibuni.

Uamuzi huo wa Mako (pichani), ambaye ni mjukuu wa mfalme Akihito kukubali kuachana na ufalme, umekuja baada ya kukubali kuolewa na Kei Komuro ambaye ni mwananchi wa kawaida nchini. Wawili hao walipendana baada ya kukutana katika hoteli moja mwaka wa 2012.

Mwanamfalme Mako mwenye umri wa miaka 25, atafunga ndoa na Komuro ambaye ni mwajiriwa wa kampuni ya mawakili, ambaye pia walisoma pamoja katika chuo cha Christian University mjini Tokyo.

Sheria za kifalme nchini, zinamtaka mtu yeyote kutoka kwenye familia ya kifalme atakayeoana na mtu asiyetoka kwenye kasri, aache ufalme.  Ufalme wa Japan umethibitisha kuwa mipango ya harusi inaendelea, lakini tarehe rasmi ya harusi itatangazwa baadaye.

Kwa upande wake, Komuro amekataa kuzungumzia mipango ya harusi yao kwa kusema kwamba; “Sio wakati mwafaka wa kuzungumza, nitasema muda ukifika.”

Hatua hiyo imezua gumzo nchini, kuhusu urithi wa ufalme huku mfalme Akihito akikaribia kustaafu.

Hii siyo mara ya kwanza kwa tukio kama hilo kutokea, kwani shangazi yake Mako, ambaye pia ni binti pekee wa mfalme akihito, Mwanamfalme Sayako, alilazimika kuondoka kasrini baada ya kuoana na mpenzi wake mwaka wa 2005.

Alilazimika kujifunza maisha ya kawaida, ikiwemo kuendesha gari na kufanya manunuzi ya bidhaa za nyumba. Mnamo mwezi Agosti mwaka uliopita, Mfalme Akihito mwenye umri wa miaka 83, alidokeza kustaafu kwake kutokana na umri wake.