Nigeria watoa picha za Buhari akiwa London

LAGOS- IKULU ya Nigeria, imetoa picha za Rais Muhammadu Buhari akiwa mjini London, Uingereza kwa mara ya kwanza tangu andoke nchini karibu siku 80 zilizopita.

Rais Buhari mwenye umri wa miaka 74, alisafiri kwenda Uingereza kupata matibabu ya ugonjwa ambao haujawekwa wazi. Jana, Rais Buhari alikutana na magavana wa chama chake ambapo alionekana mwenye furaha.

Kutokuwepo kwake kumezua wasi wasi nchini, huku wengi wakidai kuwa huenda amefariki. Wengine wana hofu kuwa huenda asiwe na uwezo wa kurudi kazini.

Buhari aliondoka Nigeria mnamo Mei 7, mwaka huu ikiwa ni safari yake ya pili kwenda Uingereza kupata matibabu. Madaraka yake kwa sasa yanakimiwa na Makamu wa Rais, Yemi Osinbajo.