Ndege ya makamu wa rais Afghanistan yazuiwa kutua

KABUL- NDEGE iliyombeba Makamu wa Rais, Abdul Rashid Dostun imezuiwa kutua kwenye uwanja wa ndege nchini, baada ya kurudi kutoka Uturuki.

Kwa mujibu wa maofisa wa Serikali, ndege hiyo ilizuiwa kutua nabado haijulikani ni nani aliyeizuia. Hata hivyo, watu wa karibu na Ashraf Ghani, wanaeleza kuwa ujio huo haukupangwa na Serikali.

Dostun aliondoka nchini kuelekea Uturuki mnamo Mei mwaka huu, huku kukiwa na madai kwamba aliwaagiza watu wake kumteka, kumpiga na hata kumbaka mpinzani wake wa kisiasa.

Amekana kufanya makosa yoyote. Msemaji wake anasema kuwa alielekea Uturuki kwa ukaguzi wa afya yake.

Atta Mohammad Noor, ambaye ni gavana wa Kaskazini mwa mkoa wa Balkh, alikuwa akisubiri katika uwanja wa ndege wa Mazar-e Sharrif kumpokea Jenerali Dostun juzi usiku, kulingana na chombo cha habari cha Pajhwok.

Zaidi ya watu 1000, waliandamana na gavana huyo kumpokea mpiganaji huyo wa zamani katika mpaka huo ambao uko karibu na mkoa wa nyumbani wa Jowzjan.

Mashahidi wanasema kuwa baadhi ya wafuasi wa Dostun walikuwa na mabango yaliyosema karibu nyumbani kiongozi wetu, kulingana na chombo cha habari cha Reuters.

BBC.