Msishiriki tendo la ndoa usiku wa kuamkia uchaguzi - Raila

NAIROBI- MGOMBEA wa urais kupitia muungano wa NASA nchini, Raila Odinga amewataka wafuasi wake kutoshiriki tendo la ndoa mkesha wa siku ya uchaguzi.

Odinga amefananisha uchaguzi huo na vita, akisema kuwa kushiriki ngono kabla ya kwenda vitani ni mkosi mbaya ambao unaweza kusababisha mtu kushindwa.

“Tunaenda vitani na ni lazima tuhifadhi nguvu zetu kabla ya siku ya vita ambayo ni Agosti 8. Hakuna hata mmoja wetu ambaye anafaa kushiriki ngono kabla ya mkesha wa siku ya uchaguzi,” Raila aliwaambia wafuasi wake Homa Bay.

Odinga aliwasisitizia zaidi wanaume, akisema itasababisha wengi wao kutopiga kura. Kwa wanawake, Raila alisema hawafai kukubali kushiriki tendo hilo na waume zao usiku wa kuamkia siku ya uchaguzi.

“Kila mwanamke anafaa kumnyima mumewe haki yake ya tendo la ndoa. Hatua hiyo itatufanya kuamka mapema alfajiri, ili kupiga kura na kulinda kura na kuilinda siku nzima hadi pale kura zitahesabiwa na kutangazwa,” alisema kiongozi huyo.

Siyo mara ya kwanza kwa kiongozi huyo wa chama cha ODM, kukataza tendo la ngono wakati wa uchaguzi.

Wakati wa uzinduzi rasmi wa kampeni za muungano wa NASA mjini Kakamega, mnamo Juni 3 mwaka huu, Odinga aliwaambia wafuasi wake kusubiri hadi pale matokeo yatakapotangazwa ili kuweza kufurahia tendo hilo la ndoa.

“Nawaomba wanawake, muwaambie waume zenu wasubiri hadi baada ya uchaguzi ili kuweza kushiriki tendo hilo ili kusherehekea ushindi wetu,” alisema Raila.

BBC