Mpinzani wa Obama 2008 akutwa na saratani ya ubongo

ARIZONA- OFISI ya Seneta wa chama cha Republican, John McCain, imeeleza kuwa kiongozi huyo amekutwa na saratani ya ubongo na kwa sasa anatafuta matibabu.

Matibabu hayo, huenda yakashirikisha matumizi ya dawa ama mionzi kulingana na daktari wake. Mwanasiasa huyo mwenye umri wa miaka 80, yuko katika hali nzuri akiendelea kupata ahueni nyumbani kwake.

Uvimbe huo ulipatikana wakati wa upasuaji wa kuondoa damu ilioganda juu ya jicho lake la kushoto. McCain ambaye alikuwa mwanajeshi aliyepigana vita nchini Vietnam, pia aliwahi kutumikia kifungo cha miaka mitano jela.

Seneta huyo aliyehudumu kwa mihula sita na kuwa mgombea wa urais wa chama cha Republican 2008, alifanyiwa upasuaji katika hospitali ya Phoenix jimboni hapa wiki iliyopita.

Uchunguzi wa tishu ulibaini kwamba, uvimbe wa ubongo unaojulikana kama glioblastoma ulisababisha damu hiyo kuganda kulingana na taarifa ya kliniki hiyo ya Mayo.

Madaktari wa Seneta huyo, wanasema kuwa anaendelea kupona kutoka kwa upasuaji huo na afya yake iko sawa.

Matibabu yake yatashirikisha utumiaji wa dawa na mionzi. Glioblastoma ni uvimbe mbaya wa ubongo, na huongezeka kutokana na umri wa mtu ukiwaathiri wanaume wengi zaidi ya wanawake.

McCain ambaye ndiye mwenyekiti wa kamati ya seneti kuhusu huduma za jeshi, alikuwa katika hali nzuri huku akiendelea kupona nyumbani na familia yake.

BBC