Mkuu wa mawasiliano ikulu ya Marekani ajiuzulu

WASHINGTON DC- Mkuu wa kitengo cha mawasiliano katika Ikulu ya White House, Sean Spicer amejizulu.

Taarifa zinaeleza kuwa, Spicer amejiuzulu kutokana na mabadiliko yaliyofanywa katika kitengo hicho.

Kwa mujibu wa gazeti la New York Times, Spicer ameng'atuka kutoka kwenye wadhifa wake, kwa sababu hajaridhishwa na hatua ya Rais Donald Trump kumteua Anthony Scaramucci kuwa Mkurugenzi mpya wa Mawasiliano.

Mshirika mkuu katika soko la Wall Street, Scaramucci ameteuliwa kuhudumu katika wadhifa huo ambao Spicer alifanikiwa kutekeleza sehemu ya majukumu yake.

Vikao vya Spicer na wanahabari vilikuwa maarufu, lakini hajahutubia wanahabari wiki za karibuni.

Mabadiliko kwenye kitengo hicho, yametokea wakati ambapo ikulu ya White House inakabiliwa na tuhuma kwamba Urusi iliingilia uchaguzi wa urais wa mwaka jana kumsaidia Trump kushinda.

Aidha, kuna tuhuma kwamba maofisa wa kampeni wa Trump huenda walishirikiana na maofisa wa Urusi. Gazeti hilo linasema kuwa Spicer, 45, alipinga vikali kuteuliwa kwa Scaramucci.

BBC.