Mezani Leo; Arsenal wajitosa kwa Benzema # PSG yampandia Neymar # Man United wamkimbia Dier

LONDON- ARSENAL wameripotiwa kuulizia upatikanaji wa mshambuliaji wa Ufaransa na Real Madrid, Karim Benzema (29) ili kuja kuwa mbadala wa mshambuliaji wao anayetaka kuondoka klabuni hapo msimu huu, Alexis Sanchez. Don Balon.

Mshambuliaji wa Barcelona, Neymar, ameripotiwa kukubali ofa ya matajiri wa Ufaransa, PSG, baada ya timu hiyo kukubali kulipa dau la pauni milioni 195 (sh bilioni 565.5) zilizopo kwenye kipengele cha mauzo ya mchezaji huyo. Esporte Interativo.

Manchester United wamejitoa rasmi kwenye mchakato wa kumsajili kiungo wa Tottenham Hotspurs, Eric Dier (23), kwa madai kuwa Spurs hawako tayari kumuuza mchezaji huyo. BBC.

 

Kiungo wa Everton, Ross Barkley (23) amewaambia Tottenham Hotspurs kwamba, kama wanamtaka basi wajitayarishe kumlipa mshahara wa pauni 150,000 (sh milioni 435) kwa wiki. Daily Mirror.

Wagonga Nyundo wa London, West Ham United wanatarajiwa kukamilisha muda wowote dili lao la kumsajili mchezaji wa zamani wa Man United, Javier Hernandez (29) ambaye kwa sasa anakipiga Bayer Leverkusen kwa dau la pauni milioni 13 (sh bilioni 37.7). Daily Express.

Licha ya PSG kuwa tayari kulipa dau la pauni milioni 195 (sh bilioni 565.5), ili kumsajili mshambuliaji wa Barcelona, Neymar, makamu wa rais wa wababe hao wa Catalunya, Jordi Mestre amesisitiza mchezaji huyo haondoki kwenye timu hiyo. Daily Star.

Tottenham Hotspurs wanakabiliwa na wakati mgumu kuhusiana na hatima ya mchezaji wao, Moussa Sissoko (27). Klabu hiyo inatarajiwa kumlipa Sissoko ili aondoke licha ya kumnunua kwa pauni milioni 30 (sh bilioni 87) mwaka jana. Daily Mail.

Mchambuzi nguli wa soka bara la Amerika, Tim Vickery amesema Neymar yuko tayari kuondoka Barcelona ili kukikimbia kivuli cha mshambuliaji mwenzake nyota, Lionel Messi. BBC Radio 5.

Licha ya Alexis Sanchez kusisitiza mara kwa mara kuwa anataka kuondoka Arsenal msimu huu, kocha wa timu hiyo, Arsene Wenger amesema kamwe hawezi kumuuza mshambuliaji huyo anayewindwa vikali na Manchester City pamoja na PSG ambao wameeleza kumtaka. Sky Sports.