Ajuza mzoefu wa wizi akamatwa Marekani

GEORGIA- AJUZA mmoja anayedaiwa kuwa na miaka 86, maarufu kwa wizi wa vito tangu miaka ya 1950 ameshtakiwa tena kwa wizi.

Bibi huyo, Doris Payne alikamatwa katika duka moja katika eneo la Chamblee mjini Georgia kwa wizi wa vito vyenye thamani ya dola 86 (sh 189,200), kulingana na maofisa wa polisi.

Hata hivyo, bibi kizee huyo ameachiliwa kwa dhamana. Alikamatwa kutokana na kufungwa mguuni kifaa maalum cha kumfuatilia mtu, baada ya kuhusika kwenye wizi katika duka lingine.

Payne ametumikia vifungo kadhaa kwa uhalifu aliotekeleza na anadaiwa kuiba vito vyenye thamani ya dola milioni 2 na kusababisha kuandikwa katika makala maalum ya mwaka 2013.

Mfanyakazi mmoja wa duka la vito, alisema bibi huyo aliiba vitu kadhaa kutoka kwa duka la dawa, vifaa vya kielektroniki na katika duka la mboga.

Wakili wa ajuza huyo, Drew Finding alinukuliwa na chombo kimoja cha habari akisema; “Hiki ni kisa cha kipekee ikilinganishwa na visa vingine vilivyopita.”

“Tunazungumzia kile bibi wa miaka 86 anachotaka ili kuweza kuishi kila siku, ikiwemo chakula na matibabu.”

Hivi karibuni alikiri kuiba mkufu kutika duka moja huko Atlanta. Alihukumiwa kifungo cha nyumbani na kupigwa marufuku kuingia katika maduka ya jumla katika eneo hilo.