Trump kuzuru Israel chini ya ulinzi mkali

WASHINGTON DC, Marekani

RAIS Donald Trump anazuru Israel na maeneo ya Wapalestina leo, akiendelea na ziara yake ya kikazi katika maeneo ya Mashariki ya Kati.

Atafika maeneo hayo akitokea Saudi Arabia, mshirika muhimu wa Marekani, ambako alitoa hotuba katika mkutano mkuu wa nchi za Kiarabu na Kiislamu.

Trump (pichani) anatarajiwa kufanya mazungumzo na viongozi wa Israel na Palestina katika kipindi cha siku mbili atakazokuwa eneo hilo.

Rais huyo alisema kupatikana kwa mkataba wa amani kati ya Waisraeli na Wapalestina, yatakuwa mafanikio makubwa, lakini hakusema mkataba kama huo unafaa kuchukua mwelekeo gani.

Alisema angependa pande zote mbili ziamue kuhusu mkataba huo wa amani kwa mashauriano ya moja kwa moja.

Katika mkutano mkuu wa viongozi wa Kiislamu na Kiarabu mjini Riyadh jana, Trump aliwataka viongozi hao kuwa mstari wa mbele katika kukabiliana na wanamgambo wa Kiislamu na wapiganaji wenye itikadi kali na ‘kuwafurusha kutoka kwenye dunia hii.’

Aliitaja moja kwa moja Iran na kusema kwamba imekuwa ‘ikichochea mizozo ya kidini na ugaidi’ katika kanda hiyo kwa miongo mingi.

Trump pia alikaririwa tena akisema kwamba, anaamini amani kati ya Waisraeli na Wapalestina inaweza kupatikana. Rais huyo amekuwa akichukuliwa kuwa muungaji mkono mkubwa wa Israel kuliko mtangulizi wake, Barack Obama.

Amechukua msimamo usio mkali, kuhusu suala tata la Israel kujenga makazi ya walowezi maeneo ya Wapalestina na kudokeza kwamba upanuzi wa makao hayo na si kuwepo kwa makao yenyewe, unaweza kuwa ndio kikwazo katika kutafuta amani.

Zaidi ya Wayahudi 600,000 huishi katika makao makazi 140 ya walowezi ambayo yamejengwa tangu Israel ilipotwaa maeneo ya Ukingo wa Magharibi na Mashariki mwa Jerusalem mwaka 1967, maeneo ambayo Wapalestina huyachukuliwa kuwa sehemu ya ‘taifa litakaloundwa’ la Wapalestina.

Makazi hayo ni haramu chini ya sheria za kimataifa, lakini Israel hupinga hilo.

Rais huyo pia ametoa ishara za kukanganya kuhusu mji wa Jerusalem, na kuahidi kuhamishia ubalozi wa Israel mjini humo kutoka Tel Aviv, hatua iliyowakera Wapalestina lakini ikawafurahisha zaidi Waisraeli.

Hata hivyo, baadaye alionekana kulegeza msimamo huo, na Waziri wa Mambo ya Nje, Rex Tillerson juzi aliambia NBC News kwamba Trump bado analitafakari jambo hilo.

Mzozo kuhusu Jerusalem

Israel huuchukulia mji wote wa Jerusalem kuwa mji wake mkuu, huku Palestina ikichukulia maeneo ya Mashariki ya mji huo kuwa makao makuu yake.

Jamii ya kimataifa haijatambua umiliki wa Israel kwa mji wa Jerusalem na mataifa mengi yana ofisi za kibalozi mjini Tel Aviv. Kumekuwa na wasiwasi kidogo Israel kabla ya ziara ya Trump kutokana na baadhi ya matamshi ya maofisa wake.

Waziri Mkuu wa Israel, Benjamin Netanyahu amepuuza maneno ya Tillerson kwamba kuhamishwa kwa Ubalozi wa Marekani kunaweza kuathiri shughuli ya kutafuta amani eneo hilo.

Ofisa wa Kibalozi wa Marekani, naye aliwakera Waisraeli aliposema kuwa Ukuta wa Magharibi, moja ya maeneo matakatifu zaidi katika dini ya Kiyahudi haumo “katika maeneo yenu (Waisraeli) bali ni sehemu ya Ukingo wa Magharibi.”

White House baadaye ilisema tamko la ofisa huyo wa kibalozi ‘hayawakilishi msimamo wa Marekani’.

Ziara ya Trump inajiri siku chache, baada ya taarifa kusema Trump alifichua taarifa za siri kwa Warusi ambazo huenda zilitoka kwa mdokezi kutoka Israel.

Kisa hicho kimeibua maswali kuhusu usiri na usalama wa habari za kijasusi zinazokabidhiwa Marekani na Israel.

Operesheni kubwa ya kiusalama inaendelea kabla ya ziara ya Trump, ambaye anatarajiwa kukutana na Netanyahu mjini Jerusalem leo na kesho atakutana na kiongozi wa Wapalestina, Mahmoud Abbas mjini Bethlehem.

Ajenda ya ziara ya Trump

Trump pia atazuru Brussels, Vatican, naSicily. Ziara hiyo imegubikwa na mtafaruku wa kisiasa nchini mwake, sana kutokana na hatua yake ya kumfuta kazi mkuu wa FBI James Comey.

• Jumatatu -Jumanne, 22-23 Mei: Tel Aviv na Jerusalem, kabla ya kuzuru Ukingo wa Magharibi Jumanne
• Jumatano 24 Mei: Roma na Brussels. Bw Trump atakutana na Papa Francis, kisha viongozi wa Ubelgiji
• Alhamisi, 25 Mei: Mkutano wa Nato mjini Brussels
• Ijumaa, 26 Mei: Sicily, kwa mkutano wa G7