‘Trump aliitaka FBI kusitisha uchunguzi dhidi ya Flynn’

WASHINGTON DC, Marekani

RAIS Donald Trump alimtaka aliyekuwa mkurugenzi wa shirika la FBI James Comey kusitisha uchunguzi uliokuwa ukiendelea dhidi ya aliyekuwa mshauri wa masUala ya usalama, Michael Flynn.

Kulingana na barua iliyoandikwa na James Comey, Trump alimwambia kiongozi huyo wa FBI kwamba; “Natumai utawachana na haya,” katika mkutano uliofanyika Ikulu ya Whitehouse mnamo Februari mwaka huu.

Barua hiyo iliandikwa mara moja baada ya mkutano, siku moja baada ya Michael Flynn kujiuzulu kulingana na vyombo vya habari vya Marekani. Ikulu ya Whitehouse imekana ripoti hiyo kwa taarifa.

“Rais Trump hajamtaka Comey ama mtu yeyote kusitisha uchunguzi ikiwemo uchunguzi wowote unaohusiana na jenerali Flynn,” ilisema.

Flynn alilazimika kujiuzulu Februari mwaka huu, baada ya kumdanganya makamu wa rais kuhusu mazungumzo yake na Balozi wa Urusi kabla ya Trump kuchukua mamlaka.

Mgogoro huo wa hivi karibuni kuhusu Urusi, ulioripotiwa mara ya kwanza na gazeti la The New York Times, unajiri wiki moja baada ya Trump kumfuta kazi Comey kuhusu alivyofanya uchunguzi wa matumizi ya barua pepe za kibinafsi uliotekelezwa na Hillary Clinton akiwa waziri.

Kufutwa kazi kwa Comey kulizua hisia kali nchini, huku wakosoaji wakimshutumu Rais Trump kwa kujaribu kusitisha uchunguzi huo wa FBI kuhusu madai kwamba Urusi iliingilia uchaguzi wa Marekani mbali na ushirikiano wa maofisa wa Trump na Urusi.