Korea Kusini washambulia kifaa cha Korea Kaskazini

Sehemu ya mpakani mwa Korea Kusini na Korea Kaskazini linalojulikana kwa jina la Paju. Eneo hilo hakuna shughuli za kijeshi zinazoruhusiwa kufanyika.

SEOUL, Korea Kusini

SERIKALI imesema kuwa imekishambulia ‘kifaa’ kutoka Korea Kaskazini kilichorushwa katika eneo maalum lisilo la kijeshi.

Takriban risasi 90 zilifyatuliwa zikielekezwa kwa kifaa hicho, ambacho kufikia sasa hakijajulikana kilikuwa ni nini hasa. Miaka iliyopita, Korea Kaskazini ilirusha ndege zisizokuwa na rubani katika mpaka huo.

Katika taarifa yao, jeshi la Korea Kusini limesema kuwa limeweka ulinzi mkali. Kisa hicho kinajiri wakati ambapo kuna wasiwasi mkubwa katika rasi ya Korea. Siku ya Jumapili Pyongyang, ilitekeleza kile ilichodai kuwa jaribio lililofanikiwa la kombora la masafa ya kadri.

Jaribio hilo linajiri wiki moja baada ya Korea Kaskazini, kufanyia majaribio kile ilichodai kuwa ni kombora jipya linaloweza kubeba kichwa cha nyuklia, ambalo lina uwezo wa kushambulia Marekani.

Baraza la Usalama la Umoja wa Mataifa, lilitarajiwa kufanya kikao cha faragha kuhusu Korea Kaskzini jana jioni. Katika taarifa siku ya Jumatatu, lilikubali kuchukua hatua muhimu ikiwemo vikwazo ili kuishinikiza Korea Kaskazni kusitisha hatua yake.

Ongezeko hilo la wasiwasi linajiri wakati ambapo kuna rais mpya nchini, Moon Jae ambaye alikula kiapo cha kuchukua mamlaka mapema mwezi huu baada ya mtangulizi wake Park Geun Hye kushtakiwa.