Ndumbaro huru kifungo cha TFF

SHIRIKISHO la Mpira wa Miguu Tanzania (TFF) limetangaza kumfutia kifungo cha miaka saba cha kutojihusisha na masuala ya soka, Wakili Damas Ndumaro aliyefungiwa zaidi ya miaka miwili iliyopita.

Uamuzi huo wa Kamati ya Rufaa ya Nidhamu ya TFF ulitangazwa na mwenyekiti wake, Rahim Shaban Zuberi kwenye ofisi za TFF zilizopo Karume jijini Dar es Salaam, jana.

Akizungumza Dar es Salaam jana, Zuberi alisema kamati yao imefikia uamuzi huo kutokana na Ndumbaro kuomba kufanyiwa marejeo kwa hukumu yake, na wao walibaini hakupata nafasi ya kujitetea huku pia baadhi ya mambo hayakuzingatia usawa wakati akifungiwa.

Awali Ndumbaro alihukumiwa mwaka mmoja kwa kosa la kwanza kutoa taarifa zisizo sahihi kiasi cha kupotosha uamuzi wa TFF kinyume cha kanuni nambari 41 kifungu kidogo cha sita cha kanuni za Ligi toleo la mwaka 2014.

Pia, alifungiwa miaka saba kwa kosa la pili, ambalo ni kushawishi au kupotosha na kuzuia uamuzi wa TFF kupitia bodi ya Ligi kinyume cha kanuni ya nne kifungu kidogo cha 16 toleo la mwaka 2014.

Ndumbaro alisema klabu 12 za Ligi Kuu zilimwomba kuwawakilisha kupinga makato ya asilimia tano za fedha za udhamini wa Ligi Kuu, wakati klabu nyingine zilikana kuhusika na mpango huo, Coastal Union na Stand United.

Ndumbaro alikuwa ametumikia adhabu yake kwa muda wa miaka miwili na miezi tisa.

Kamati hiyo pia imemwachi huru aliyekuwa kocha wa timu ya Geita Gold Mine, Choke Abeid  kuendelea na shughuli za soka, ambaye awali alifungiwa maisha kutokana na tuhuma za kupanga matokeo katika mchezo dhidi ya JKT Kanembwa msimu wa 2015-16.

“Lakini kamati pia ilipitia rufaa za watu wengine waliohukumiwa kutojihusisha na soka wakiwemo Yusuph Kitumbo, Fatch Rhemtullah na Thomas Mwita, hawa adhabu yao itaendelea kama ilivyo mwanzo,” alisema Zubery 

Hukumu hiyo imetoka siku mbili baada ya kamati hiyo , chini ya mwenyekiti wake, Tarimba Abass kumfutia adhabu Mkuu wa Kitengo cha Habari na Mawasiliano wa Simba, Haji Manara adhabu ya kufungiwa kutojihusisha na soka kwa kipindi cha miezi 12 na kulipa faini ya sh milioni 9.

Mbali na Manara, kamati hiyo pia iliwafutia adhabu Kaimu Katibu Mkuu wa Chama cha Mpira wa Miguu Rukwa, Blassy Kiondo na mwenyekiti wake Ayubu Nyaulingo na Mwenyekiti wa Kamati ya Uchaguzi Rukwa ambao walikuwa wamefungiwa kutokana na kufanya uchaguzi wakati TFF iliwazuia.