Kenyatta aionya mahakama Kenya

NAIROBI- RAIS wa Kenya Uhuru Kenyatta ameionya idara ya mahakama nchini, akiitaka kutousaidia upinzani na kuhujumu uchaguzi ujao.

Hayo yanajiri baada ya Mahakama Kuu nchini, kutoa uamuzi mgumu wa kusimamisha zabuni ya uchapishaji wa karatasi za kupigia kura iliyotolewa kwa kampuni ya Al Ghurair ya Dubai, kwa madai kuwa ina uhusiano na familia ya Rais Uhuru Kenyatta.

Kenyatta alisisitiza kuwa uchaguzi huo utafanyika kama ulivyopangwa na kuongeza kuwa, mahakama haiwezi kudai kuwa huru na kutumia uhuru huo kuingilia idara zingine za Serikali.

Muungano wa upinzani wa NASA ulidai kuwa, rais alikuwa na uhusiano na kampuni ya Dubai la Al Ghurair ambayo ilishinda zabuni ya dola milioni 24 kuchapisha makatasi hayo.

Hata hivyo Jaji Mkuu nchini, David Maraga, amemuonya Rais Uhuru Kenyatta kutohujumu imani ya umma juu ya mfumo wa kisheria.

Nayo tume ya Uchaguzi nchini (IEBC) leo inatarajiwa kukutana na wagombea wote wanane wa kiti cha uraisi akiwemo Rais Uhuru Kenyata.

Mawakili wa IEBC hiyo pia watafika mbele ya Mahakama ya Rufaa kupata ufafanuzi zaidi juu ya uamuzi huo.

BBC