Wakenya waadhimisha miaka 25 ya wimbo wa 'Stella Wangu' wa Freshley Mwamburi

Mwanamuziki mtunzi na mwimbaji wa wimbo wa Stella Wangu, Freshley Mwamburi akiwa na mke wake wa sasa, Dorcas Nduku.

NAIROBI, Kenya

MAELFU ya wananchi watumiaji wa mitandao nchini, jana wamechangamkia wimbo wa Stella Wangu wa mwanamziki mashuhuri, Freshley Mwamburi.

Wakenya walilazimika kuuchangamkia wimbo huo wakikumbuka tukio lililowahi kutokea tarehe 17/5/1992 wakati mpenzi mwanamke mmoja ajulikanae kama, Stella, aliposhuka kutoka kwa ndege na mchumba wake wa urefu wa futi nne Mjapani, huku amebeba mtoto mkononi.

Kisa hicho cha kweli kilichomtokea Freshley, jana kilikuwa kikifikisha miaka 25 tangu siku hiyo. Freshley anasema alitaka tu kuthibitisha ni kweli Stella ameamua kuolewa na mwalimu wake huyo huko Japan alikoenda kusomea utabibu.

Wakenya wametuma ujumbe kwenye mitandao ya kijamii, wengine wakimkashifu Stella kwa kumtumia vibaya Freshley, ambaye alilazimika kuuza mifugo na shamba lake ili Stella apate nauli ya kwenda Japan kusoma.

Lakini sasa Freshley amesahau yote hayo, na bado anawasiliana kwa simu na Stella akiwa Tokyo, Japan, lakini anasema hamna lolote la kimapenzi ila ni kujuliana hali tu. Stella sasa ana watoto wawili, naye Freshley ameoa na ana watoto wanne - wavulana watatu na msichana mmoja.

Katika wimbo wake, Freshley aliimba:

"Nilikua na mchumba wangu, tulipendana kama nyama choma

Alibahatika kwenda ngambo, chuo kikuu kwenda kusoma, miaka mitatu kule Japani kusomea udakitari, Stella wangu ehhh.

Nilivyompenda Stella jamani kajitolea kwa roho moja, nikauza shamba langu, sababu yake yeye,

Nikauza gari langu, sababu yake yeye nikauza Ng'ombe na mbuzi sababu yake yeye,

Ili apate nauli ya ndege na pesa nyngine za matumizi kule Japani,

Ilikua tarehe kumi na saba mwezi wa tano, ilikua tarehe kumi na saba mwezi wa tano, ndiyo ilokua tarehe kamili ya Stella kurudi Kenya.

Nilikwenda uwanja wa ndege kwenda kumlaki Stella, nilikua na uncle (mjomba/au rafiki) Kilinda uwanja wa ndege,"

"Ghafla ndege ilipotua uwanajani tuliona vituko, Stella alishuka amebeba mtoto mkononi, nyuma yake mchumba wake mfupi, futii nne Mjapani,

Nilisikitika ndani ya moyo nikakosa la kufanya,

Nilitamani nilie Kikamba lakini si kijui, ilibidii nilie Kijaluo "angatima ngo wachoa",

Freshley, nilitamani nilie Kihindi lakini si kijui, ilini bidii nilie Kitaita lugha ya mama na baba,

ilinibidi nilie Kitaiaa, "beke mwana niponyebanda, Freshley".

Usikilize mwenyewe