Dogo Mfaume wa ‘kazi yangu ya dukani’ afariki dunia

TASNIA ya Bongo Fleva imepatwa na msiba, baada ya msanii aliyewahi kutamba na wimbo wa ‘Kazi yangu ya Dukani’ anayejulikana kwa jina la Dogo Mfaume kufariki dunia.

Kwa mujibu wa taarifa kutoka kwa chanzo cha kuaminika, Dogo Mfaume amefia katika Hospitali ya Taifa ya Muhimbili alikokuwa akitibiwa.

Taarifa hizo zinaeleza kwamba, Dogo Mfaume alikuwa akisubiri kufanyiwa upasuaji siku ya Ijumaa ili kuondoa uvimbe uliokuwa kwenye ubongo kichwani mwake.

Mmiliki wa Sobber House alikokua akisaidiwa ili kuachana na utumiaji wa dawa za kulevya amesema ‘alikua afanyiwe upasuaji Ijumaa kutokana na uvimbe kwenye ubongo na alikua tayari ameshapangwa kwenye ratiba’

‘Afya yake ilikua nzuri kabisa na alikua ana mwaka mmoja toka ameacha utumiaji wa dawa za kulevya ‘unga’ na tulikua tumejiandaa kesho twende tukamtolee damu’

Akiongea huku analia Mmiliki huyo wa Sobber House alisema kwamba; “Afya yake ilikua nzuri kabisa na aliniambia dada mimi sitaki kuondoka kwako, nataka unisimamie kila kitu na sitaki kurudi mtaani, mtaani hali mbaya na nikikaa kule nitarudi kutumia unga”